വോട്ടര്‍മാരും സ്ഥാനാര്‍ഥികളും പ്രവര്‍ത്തിക്കുക

തദ്ദേശസ്വയംഭരണ തെരഞ്ഞെടുപ്പില്‍ വോട്ടു ചെയ്തു കഴിഞ്ഞെന്നു കരുതി സമ്മതിദായകരുടെ ചുമതല അവസാനിക്കുന്നില്ല. ജനവിധി തേടിയവര്‍ ജനഹിതം നടപ്പാക്കുന്നുണ്ടോ എന്നു ഉറപ്പുവരുത്തേണ്ട ഉത്തരവാദിത്തവും വോട്ടര്‍മാര്‍ക്കുണ്ട്. തെരഞ്ഞെടുപ്പില്‍ പരാജയപ്പെട്ട സ്ഥാനാര്‍ഥികളും കാര്യങ്ങള്‍ നടപ്പിലാക്കാന്‍ ഊര്‍ജസ്വലതയോടെ നാട്ടുകാരുടെയിടയില്‍ തുടര്‍ന്നു പ്രവര്‍ത്തിക്കണം. ജനപ്രതിനിധികള്‍ സ്ഥാനമേല്‍ക്കുന്ന ദിവസം മുതല്‍ വാര്‍ഡിന്റെ ആവശ്യങ്ങള്‍ ഓരോന്നായി നടപ്പാക്കണം. ഇനി അതിനു പതിവുപോലെ അനേക വര്‍ഷങ്ങള്‍ കാത്തിരിക്കാനാകില്ല. എല്ലാവരും ഒത്തൊരുമയോടെ പ്രവര്‍ത്തിക്കുകയാണ് വികസനത്തിനു വേണ്ടത്. കക്ഷി, രാഷ്ട്രീയ, ജാതി, മത വ്യത്യാസങ്ങള്‍ ഒന്നിനും തടസ്സമാകരുത്. നഗരസഭാ ഭരണസമിതിയില്‍ നിന്നു എന്നത്തേയുംപോലെ ഒത്തിരി പ്രതീക്ഷകളാണു പൊതുജനങ്ങള്‍ വച്ചുപുലര്‍ത്തുന്നത്.

ആലപ്പുഴ നഗരസഭയില്‍ പുതിയ ഭരണ സമിതി ചുമതലയേല്‍ക്കുമ്പോള്‍ ഭരണകര്‍ത്താക്കള്‍ തത്തംപള്ളി വാര്‍ഡിന് എന്താണ് ചെയ്തു തരേണ്ടത്? ഉടന്‍ പരിഹരിക്കേണ്ട പ്രശ്‌നങ്ങള്‍, ഉടന്‍ പരിഗണനയില്‍ എടുക്കേണ്ട വികസന പദ്ധതികള്‍, നടപടികളുടെ മുന്‍ഗണനാക്രമം എന്നിവയൊക്കെ ഭരണകര്‍ത്താക്കളെ അറിയിക്കാന്‍ തത്തംപള്ളി വാര്‍ഡ് ബ്ലോഗ് അവസരമൊരുക്കുന്നു.

പൊതുവായി പ്രയോജനമുണ്ടാകുന്ന പ്രധാനപ്പെട്ട നിര്‍ദേശങ്ങള്‍ thathampallyward@gmail.com എന്ന ഇ-മെയില്‍ ഐഡിയിലേക്ക് അയക്കുക. ചേരുന്ന ഫോട്ടോകളും അയക്കാവുന്നതാണ്. തെരഞ്ഞെടുക്കപ്പെടുന്നവ ബ്ലോഗില്‍ ഉടന്‍ പ്രസിദ്ധീകരിക്കും. ആവശ്യപ്പെടുന്നവരുടെ പേരും ഉള്‍പ്പെടുത്തും. നിര്‍ദേശങ്ങള്‍ക്കും പരാതികള്‍ക്കും ബന്ധപ്പെട്ടവര്‍ നല്കുന്ന മറുപടിയും എന്തെങ്കിലും നടപടി എടുത്തുവെന്ന് അറിയിച്ചാല്‍ അതിന്റെ വിശദവിവരങ്ങളും പിന്നാലെ പ്രസിദ്ധീകരിക്കും. നാടിന്റെ നന്മയ്ക്കും വികസനത്തിനുമായി എല്ലാവരും കണ്ണുതുറന്നിരിക്കുക, പ്രവര്‍ത്തിക്കുക. പരാതികളും നിര്‍ദേശങ്ങളും പരാതിപ്പെട്ടിയിലേക്ക് അയക്കുക. ലോകത്തിന്റെ എതു ഭാഗത്തുനിന്നും അയക്കാം.   -എഡിറ്റര്‍, തത്തംപള്ളി വാര്‍ഡ്.