സ്വന്തം വാഹനങ്ങളിലെത്തി ബസു കയറിപ്പോകുന്നവര്‍ മോട്ടോര്‍സൈക്കിളുകളും മറ്റും വച്ചിട്ടുപോകുന്നത് സ്റ്റേഷനു കിഴക്കുഭാഗത്തുള്ള റോഡുവക്കിലാണ്. വര്‍ഷങ്ങളായി തുടരുന്ന പതിവാണത്. നൂറുകണക്കിന് ആള്‍ക്കാര്‍ ഇങ്ങനെ ചെയ്യുന്നു. എന്നാല്‍ അവിടെ 'നോ പാര്‍ക്കിംഗ്' ബോര്‍ഡ് സ്ഥാപിച്ചിട്ടുള്ളതിനാല്‍ പോലീസ് നടപടിക്കു സദാ സാധ്യതയുണ്ട്. ടയറില്‍ നിന്നു കാറ്റു കുത്തിവിടുക, താക്കോല്‍ തട്ടിപ്പറിക്കുക, ഓടിക്കുമ്പോള്‍ ഹാന്‍ഡിലില്‍ പിടിച്ചു വീഴ്ത്തുക തുടങ്ങിയ രീതികളില്‍ പോലീസ് നിയമം നടപ്പിലാക്കുന്നതിനെതിരേ ഇടയ്ക്ക് വ്യാപകമായ പരാതിയും പ്രതിഷേധവും ഉണ്ടാകാറുണ്ട്. റോഡില്‍ ഗതാഗതതടസ്സമുണ്ടാക്കുന്നുവെന്നു സൂചിപ്പിച്ചായിരിക്കും പോലീസ് വേട്ട. സമീപത്തുള്ള ഫയര്‍ സ്റ്റേഷനില്‍ നിന്നുള്ള ഫയര്‍ എന്‍ജിനുകള്‍ക്കു കടന്നു പോകേണ്ടതുണ്ടെന്നു അറിയാമെന്നും അതിനാല്‍ ഒരു മാര്‍ഗതടസ്സവുമുണ്ടാക്കാതെയാണ് ഇരുചക്രവാഹനങ്ങള്‍ പാര്‍ക്കു ചെയ്യാറുള്ളതെന്നും യാത്രക്കാര്‍ ചൂണ്ടിക്കാട്ടുന്നു.
ബസ് സ്റ്റേഷനു വടക്കു റോഡിനു എതിര്‍വശത്ത് കനാല്‍ക്കരയില്‍ നിരയായുള്ള കടകളുടെ മുന്നില്‍ അല്പ നേരത്തേക്കു പോലും വാഹനങ്ങള്‍ പാര്‍ക്കു ചെയ്താല്‍ കടക്കാരുടെ പ്രതിഷേധം ഉയരും. അനധികൃതമായി സ്ഥാപിച്ചിട്ടുള്ള ഇവിടുത്തെ കടകള്‍ പല പ്രാവശ്യം പൊളിച്ചു നീക്കി പാര്‍ക്കിംഗിനു സൗകര്യം ഒരുക്കിയിട്ടുണ്ടെങ്കിലും വൈകാതെ കടകള്‍ വീണ്ടും സ്ഥാപിച്ച് ഇപ്പോള്‍ ഒരു സ്ഥിര ഏര്‍പ്പാടായി മാറ്റിയിരിക്കുകയാണ്. സ്റ്റേഷനിലേക്കു യാത്രക്കാരുമായി വരുന്ന വാഹനങ്ങള്‍ക്കു അല്പ നേരം പോലും ഇതിനാല്‍ പാര്‍ക്കു ചെയ്യാനാകാത്ത അവസ്ഥയാണ്.
പൊതുഗതാഗത മാര്‍ഗങ്ങള്‍ കൂടുതലായി ഉപയോഗിച്ചാലെ റോഡിലെ വാഹനത്തിരക്കും ഇന്ധനച്ചെലവും കുറയൂ. സ്വന്തം വാഹനങ്ങളില്‍ വീടുകളില്‍ നിന്നെത്തി ജോലി സ്ഥലത്തേക്കും മറ്റും ട്രാന്‍സ്‌പോര്‍ട്ട് ബസില്‍ പോകുന്നവര്‍ അക്കാര്യത്തില്‍ സഹായിക്കുകയാണ് ചെയ്യുന്നത്. അങ്ങനെയുള്ളവരെ പ്രോത്സാഹിപ്പിക്കുകയാണ് അധികൃതര്‍ ചെയ്യേണ്ടത്. അതിനായി പാര്‍ക്കിംഗിനുള്ള സൗകര്യം ഒരുക്കേണ്ടതിനു പകരം പീഡിപ്പിക്കുകയാണെന്നു യാത്രക്കാര്‍ പരാതിപ്പെടുന്നു. പെട്രോള്‍ മോഷണം നടത്തുകയും വാഹനങ്ങള്‍ നശിപ്പിക്കുയും ചെയ്യുന്ന സാമൂഹ്യവിരുദ്ധരുടെ ശല്യം യാത്രക്കാര്‍ വേറെയും അനുഭവിക്കണം.
ഇതേ സമയം, ബസ് സ്റ്റേഷനു സമീപത്തെ റോഡുവക്കത്തുള്ള സര്‍ക്കാര്‍ പുറമ്പോക്കുകള്‍ സ്വകാര്യ സ്ഥാപനങ്ങളുടെ വാഹന പാര്‍ക്കിംഗിനായി അധികൃതര്‍ തിരിച്ചു നല്കിയിട്ടുണ്ട്. അതിനു സമീപമെങ്ങും മറ്റുള്ള വാഹനങ്ങള്‍ അടുപ്പിക്കുകയുമില്ല.
No comments:
Post a Comment