സദാ തിരക്കറിയ റോഡുകളില്‍ വാഹനഗതാഗതവും കാല്‍നടയാത്രയും തടയുന്ന രീതിയില്‍ റോഡു നിറഞ്ഞ് ജാഥകള്‍ നടത്തുമ്പോള്‍ ഗതികേടിലാകുന്നത് ആയിരക്കണക്കിന് ആള്‍ക്കാരാണ്. അതും നാടിന്റെ നാനാഭാഗങ്ങളിലേക്കും വിദേശത്തേക്കും പോകുന്നവര്‍ വരെ. അപകടത്തില്‍പ്പെട്ടവരേയും രോഗികളേയും കൊണ്ടുപോകുന്ന ആംബുലന്‍സുകള്‍ക്കു പോലും ഇത്തരം ശക്തിപ്രകടനങ്ങള്‍ക്കിടയില്‍പ്പെട്ടു വിലപ്പെട്ട സമയം നഷ്ടപ്പെടുത്തേണ്ടി വരാറുണ്ട്.
2011 ജനുവരി 11-ന് ആലപ്പുഴ പട്ടണം ഇത്തരത്തിലൊരു ഗതികേടില്‍പ്പെട്ടതിനാല്‍ തത്തംപള്ളി വാര്‍ഡിലുള്ളവരും ഗതാഗതക്കുരുക്കില്‍പ്പെട്ടു വിഷമിച്ചു. ഒരു തൊഴിലാളി സംഘടനയുടെ സംസ്ഥാന സമ്മേളനം പ്രമാണിച്ച് ഗതാഗത നിയന്ത്രണം ഏര്‍പ്പെടുത്തിയതിനാല്‍ ഉച്ചയ്ക്കു മുമ്പേ സ്‌കൂളുകള്‍ വിടേണ്ടി വന്നു. ബസുകള്‍ തോന്നിയതു പോലെ വഴിതിരിച്ചു വിട്ടു. ജാഥ മൂലം കിലോമീറ്ററുകള്‍ ദൂരം വാഹനങ്ങള്‍ ചലിക്കാതെ കിടന്നു. നാനാഭാഗത്തേക്കു പോകേണ്ട അതിലുള്ള യാത്രക്കാര്‍ അനുഭവിച്ച മിനക്കേടിന് അതിരില്ല. പോലീസ് വേണ്ടവിധത്തില്‍ വാഹനങ്ങള്‍ നിയന്ത്രിക്കാത്തതിനാല്‍ ഉണ്ടായ വാഹനത്തിരക്ക് വേറേയും.
ജാഥയുടെ വരി മുറിച്ചു കടക്കാന്‍ കാല്‍നടക്കാരെ ചിലരെങ്കിലും അനുവദിച്ചതിനാല്‍ അത്യാവശ്യക്കാര്‍ക്ക് വൈകിയാണെങ്കിലും നടന്നു ലക്ഷ്യസ്ഥാനത്തെത്താന്‍ സാധിച്ചു. സാധാരണ നിലയില്‍ ആവേശം മൂത്തു മുദ്രാവാക്യം വിളിച്ചു വഴി തിങ്ങി നടക്കുന്ന ജാഥാംഗങ്ങള്‍ അതിന് അനുവദിക്കാറില്ല.
യാത്രക്കാര്‍ക്ക് തടസ്സമുണ്ടാക്കരുതെന്നും ജാഥ വഴിയുടെ ഓരം ചേര്‍ന്നു പോകണമെന്നും വാഹനങ്ങളേയും കാല്‍നടയാത്രികരേയും റോഡു മുറിച്ചു കടക്കാന്‍ അനുവദിക്കണമെന്നും ഹൈക്കോടതി ഉത്തരവുള്ളതാണ്. എന്നാല്‍ അതൊന്നും വകവയ്ക്കാതെ ജാഥയും മതഘോഷയാത്രയും മറ്റും നടത്തുന്നവര്‍ ഒരു ന്യായവുമില്ലാതെയാണ് യാത്ര തടസ്സപ്പെടുത്തുന്നത്. ഒരിടത്തുണ്ടാകുന്ന ഗതാഗതക്കുരുക്ക് മണിക്കൂറുകളോളം മറ്റു സ്ഥലങ്ങളിലും പ്രതിഫലിക്കും.
എല്ലാവരുടേയും വഴി മുടക്കി മുഷ്ടി ആകാശത്തേക്ക് വലിച്ചെറിഞ്ഞു നേതാക്കളുടെ പിമ്പേ നടക്കുന്നവര്‍ ഓര്‍ക്കുന്നുണ്ടോ അവര്‍ ആരെയാണ് ഇതുകൊണ്ട് ഗുണപ്പെടുത്തുന്നതെന്ന്? ആര് എന്തു നേടിയെന്ന്? വഴിമുടക്കി നാടുമുടിക്കുകയാണെന്നു അവര്‍ എന്നു മനസ്സിലാക്കും?
No comments:
Post a Comment