വെബ്‌സൈറ്റില്‍ പോസ്റ്റ് ചെയ്ത കുറിപ്പിനു മറുപടിയാണ് ടീം നല്കിയിട്ടുള്ളത്. തെരഞ്ഞെടുപ്പ് കഴിയുന്ന മുറയ്ക്ക് അദ്ദേഹത്തിന്റെ ഇടപെടലുണ്ടാകുമെന്നും വാര്‍ഡിലെ മുഴുവന്‍ പേരുടെയും പിന്തുണ ഇക്കാര്യത്തില്‍ അദ്ദേഹം ആഗ്രഹിക്കുന്നുവെന്നും സൂചിപ്പിച്ചിട്ടുണ്ട്.
2010 നവംബര്‍ ഒന്‍പതിനു നിവേദനം നല്കുന്നതു സംബന്ധിച്ച അറിയിപ്പ് ബ്ലോഗില്‍ പ്രസിദ്ധീകരിച്ചിരുന്നു. ആവശ്യങ്ങള്‍ ക്രോഡീകരിച്ച് ഡിസംബര്‍ 30-ന് നിവേദനം ബന്ധപ്പെട്ടവര്‍ക്ക് തപാലില്‍ അയച്ചുകൊടുക്കുകയും പ്രസിദ്ധീകരിക്കുകയും ചെയ്തു. അതിനെക്കുറിച്ചുള്ള വാര്‍ത്ത പത്രമാധ്യമങ്ങളില്‍ വന്നിരുന്നു. തുടര്‍ന്നും ഓര്‍മ്മപ്പെടുത്തല്‍ കുറിപ്പയച്ചു. (നിവേദനത്തിന്റെ പകര്‍പ്പ് പൂര്‍ണരൂപത്തില്‍ വായിക്കാന്‍ ഇവിടെ ക്ലിക്ക് ചെയ്യുക) എന്നാല്‍ ഇതുവരെ മുനിസിപ്പല്‍ കൗണ്‍സില്‍ ഭാരവാഹികള്‍ പ്രതികരിച്ചിട്ടില്ല. കഴിഞ്ഞത് കാല്‍ വര്‍ഷം!
ഇതേസമയം, തത്തംപള്ളി വാര്‍ഡ് കാലങ്ങളായി യു.ഡി.എഫ് ഭൂരിപക്ഷ മേഖലയാണെന്നും അവിടുത്തെ പ്രശ്‌നങ്ങള്‍ പരിഹരിക്കാന്‍ യു.ഡി.എഫിന് കഴിയില്ല എന്നു ബഹുമാനപ്പെട്ട സമ്മതിദായകര്‍ തിരിച്ചറിഞ്ഞാല്‍ അവര്‍ക്ക് കൊള്ളാം എന്നും ഒരു അതിഥിയുടെ പോസ്റ്റ് വന്നു.
അതിനു മറുപടിയായി 'തത്തംപള്ളി ആലപ്പുഴയിലല്ലേ?' എന്ന തലക്കെട്ടില്‍ രവീന്ദ്രന്‍ ഇങ്ങനെ എഴുതി: ഇതാണ് തരംതാഴ്ന്ന കക്ഷിരാഷ്ട്രീയം. ഈ ടേമിലും കഴിഞ്ഞ ടേമിലും ആലപ്പുഴ മുനിസിപ്പല്‍ കൗണ്‍സില്‍ ഭരണം എല്‍ഡിഎഫിനാണ്. തത്തംപള്ളി വാര്‍ഡ് കൗണ്‍സിലര്‍ തുടര്‍ച്ചയായി യുഡിഎഫില്‍ നിന്നായതു കൊണ്ട് ആ വാര്‍ഡില്‍ ഒന്നും വേണ്ടായെന്നായിരിക്കും ഭരണപക്ഷത്തിന്റെ നിലപാട്. പിന്നെങ്ങനെ എതിര്‍പക്ഷം ഭൂരിപക്ഷമായ മേഖലയിലെ പ്രശ്‌നങ്ങള്‍ പരിഹരിക്കപ്പെടും? ആവശ്യങ്ങള്‍ സാധിക്കപ്പെടും? ഏതായാലും കുന്നുകൂടി ചീഞ്ഞുനാറുന്ന മാലിന്യങ്ങളും ഓടിനടന്നു കടിക്കുന്ന തെരുവു പേപ്പട്ടികളും ഒരു വാര്‍ഡില്‍ മാത്രം ഒതുങ്ങി നില്ക്കുന്നതല്ലെന്നു എല്ലാ സമ്മതിദായകരും തിരിച്ചറിയുന്നുണ്ട്. വര്‍ഷങ്ങളായി ആ നിലയ്ക്ക് മാറ്റമില്ലതാനും. വോട്ടര്‍മാര്‍ അടിസ്ഥാനപരമായി വളരെ നേരിട്ടിടപെടേണ്ടി വരുന്ന ഒരു മുനിസിപ്പാലിറ്റി അനേക വര്‍ഷങ്ങളായി ഇങ്ങനെ.. അതുകഴിഞ്ഞിട്ടല്ലേയുള്ളു നിയമസഭ.
അതിനു പേരു വയ്ക്കാതെ അതിഥി ഇങ്ങനെ കൂട്ടിച്ചേര്‍ത്തു: തോമസ് ഐസക്ക് കക്ഷി രാഷ്ട്രീയത്തിന്റെ അടിസ്ഥാനത്തിലല്ല കാര്യങ്ങള്‍ കാണുന്നതെന്നാണ് മനസ്സിലാക്കുന്നത്. അദ്ദേഹം നിങ്ങളെ സഹായിക്കുമായിരിക്കും... പ്രതീക്ഷിക്കുക. പക്ഷേ, തത്തംപള്ളിക്കാര്‍ കാലാകാലങ്ങളായി കക്ഷിരാഷ്ട്രീയത്തിന്റെ അടിസ്ഥാനത്തില്‍ കാര്യങ്ങളെ കാണുന്നവരാണെന്നാണ് കേള്‍ക്കുന്നത്. അതുകൊണ്ട് സൂചിപ്പിച്ചെന്നേ ഉള്ളൂ... ആലപ്പുഴ മുനിസിപ്പാലിറ്റിയിലെ മറ്റ് യൂ.ഡി.എഫ് വാര്‍ഡുകളില്‍ നിന്നും അവരെ അവഗണിക്കുന്നതായി പരാതി കേള്‍ക്കുന്നില്ലല്ലോ...
അതിനും രവീന്ദ്രന്‍ 'എല്ലാം സഹിക്കുന്നു' എന്ന തലക്കെട്ടില്‍ വിശദമായി മറുപടിയെഴുതി: പരാതിപ്പെട്ടിട്ട് എന്തു ഫലം? വിധിയെന്നു കരുതി എല്ലാവരും എല്ലാം സഹിക്കുന്നു. അത്ര തന്നെ. എന്നുകരുതി ആരും ഒന്നിനും പരാതിപ്പെടുന്നില്ലെന്നു കരുതരുത്. പത്രങ്ങളില്‍ ദിവസേന വരുന്ന ആവശ്യങ്ങളും ആവലാതികളും തന്നെ പരിശോധിക്കുക. തത്തംപള്ളിക്കു പ്രത്യേകമായി ഒന്നും വേണ്ട. പട്ടണത്തിന്റെ പരിച്ഛേദമാണ് ഈ പ്രദേശം. ഇവിടെയുണ്ടെങ്കില്‍ എല്ലായിടത്തുമുണ്ട്. വേണമെങ്കില്‍ ഏതാനും ദിവസം
കൊണ്ടു നടപ്പാക്കാവുന്ന കാര്യങ്ങള്‍ക്കു പോലും നീക്കുപോക്കില്ല. പിന്നെ, പ്രതീക്ഷയാണല്ലോ എല്ലാവരേയും നിലനിര്‍ത്തുന്നത്!
(ഡോ.ഐസക്കിന്റെ വെബ്‌സൈറ്റില്‍ വന്ന പോസ്റ്റുകള്‍ അതേപോലെ തന്നെ വായിക്കാന്‍ ഇവിടെ ക്ലിക്ക് ചെയ്യുക.)
No comments:
Post a Comment