ഇന്ന് രാത്രി പത്തിന് തത്തംപള്ളിയില്‍ വൈദ്യുതി തടസ്സമുണ്ടായത് അറിയിച്ചപ്പോഴാണ് ഈ മറുപടി. കൃത്യം പത്തിന് കറണ്ട് പോയതിനാല്‍ അപ്രഖ്യാപിത കറണ്ട് കട്ടോ മറ്റോ ആയിരിക്കുമെന്നു കരുതി ഉപയോക്താക്കള്‍ കാത്തിരിക്കുകയായിരുന്നു. എന്നാല്‍ മുക്കാല്‍ മണിക്കൂര്‍ കഴിഞ്ഞപ്പോഴും വൈദ്യുതി കിട്ടാതായതിനെത്തുടര്‍ന്നാണ് ഉപയോക്താക്കള്‍ പരാതി വിളിച്ചു പറയാന്‍ തുടങ്ങിയത്. വിവരം അറിഞ്ഞ ഉടനേ ഓഫീസില്‍ നിന്ന് നന്നാക്കാന്‍ ആള്‍ക്കാരെ വിട്ടുവെന്ന് പരാതി സ്വീകരിച്ച ഉദ്യോഗസ്ഥന്‍ അറിയിച്ചു.
തത്തംപള്ളില്‍ അടുപ്പിച്ച് രാവും പകലുമെന്ന വ്യത്യാസം കൂടാതെ ആവര്‍ത്തിച്ചുള്ള കറണ്ട് പോക്കും വരവും അനേകം മണിക്കൂറുകള്‍ നീളുന്ന തടസ്സവും മാസങ്ങളായി പതിവാണ്. സംസ്ഥാന നിയമസഭയിലേക്കു നടന്ന തെരഞ്ഞെടുപ്പു ദിനമായ പതിമൂന്നിനു അര്‍ധരാത്രിയോടെ കറണ്ട് പോയിട്ട് നേരം വെളുത്ത് എട്ടുമണിയോടെയാണ് എത്തിയത്. അത് പരക്കെ ചര്‍ച്ചാവിഷയമായിരുന്നു. അതുപോലെ ഇന്നലേയും (2011 ഏപ്രില്‍ 26) അര്‍ധരാത്രി പന്ത്രണ്ടോടെ കറണ്ട് പോയിട്ട് നേരം വെളുത്ത് ഏകദേശം ഏഴര മണിക്കു ശേഷമാണ് എത്തിയത്.
രാത്രിയില്‍ കറണ്ട് പോകുമ്പോള്‍ പരാതി പറയാന്‍ വിളിച്ചാല്‍ മിക്കസമയത്തും ടെലിഫോണ്‍ എന്‍ഗേജ്ഡ് ആയിരിക്കുമെന്നു ഉപയോക്താക്കള്‍ക്കു പരാതിയുണ്ട്. എന്നാല്‍ ഫോണ്‍ കിട്ടിയാല്‍ രാത്രി അറ്റകുറ്റപ്പണി നടത്താന്‍ പ്രായോഗിക ബുദ്ധിമുട്ടുണ്ടെന്നും നേരം വെളുത്താലെ നന്നാക്കല്‍ സാധിക്കൂ എന്നുമായിരിക്കും ഫോണ്‍ എടുക്കുന്ന ഉദ്യോഗസ്ഥന്റെ സാധാരണ നിലപാട്.
എന്നാല്‍ എല്ലാ സമയത്തും അങ്ങനെയായിരിക്കണമെന്നില്ല എന്നാണ് പരാതി വിഭാഗത്തിലെ ഉദ്യോഗസ്ഥന്‍ ഇന്ന് സൂചിപ്പിച്ചത്. പല ഫേസ് പോകുമ്പോഴാണ് ബുദ്ധിമുട്ട്. ഒറ്റ ഫേസിലാണ് പ്രശ്‌നമെങ്കില്‍ വൈകാതെ വൈദ്യുതി ബന്ധം പുനഃസ്ഥാപിക്കാനാകും.
അതിനാല്‍ വൈദ്യുതി ബന്ധം നിലച്ചാല്‍ ഉടനേ തന്നെ ആലപ്പുഴ നോര്‍ത്ത് വിഭാഗത്തിനു കീഴിലുള്ള ഉപയോക്താക്കള്‍ പരാതി 0477 2245532 എന്ന ടെലിഫോണ്‍ നമ്പരില്‍ കണ്‍സ്യൂമര്‍ നമ്പരും സ്ഥലവും സഹിതം അറിയിക്കുകയും അത് രേഖപ്പെടുത്താന്‍ ആവശ്യപ്പെടുകയും വേണം.
തത്തംപള്ളിയില്‍ മറ്റിടങ്ങളില്‍ പതിവില്ലാത്ത വിധത്തില്‍ വൈദ്യുതി തടസ്സപ്പെടുന്നതിനെക്കുറിച്ച് പ്രത്യേക അന്വേഷണം നടത്തി അത് ആവര്‍ത്തിക്കാതിരിക്കാന്‍ പരിഹാര നടപടി ഉടനേ സ്വീകരിക്കണമെന്ന ആവശ്യം കാലങ്ങളായുണ്ട്.
No comments:
Post a Comment