ആലപ്പുഴ പട്ടണത്തില്‍ പ്രവര്‍ത്തിച്ചിരുന്ന ആലപ്പുഴ ഗവണ്മെന്റ് ടി.ഡി.മെഡിക്കല്‍ കോളജ് ആശുപത്രി പൂര്‍ണമായും 2010 ജനുവരി 12-ന് ചൊവ്വാഴ്ചയാണ് വണ്ടാനത്തേക്കു മാറ്റി ഉദ്ഘാടനം ചെയ്തത്. മെഡിക്കല്‍ കോളജ് ആശുപത്രി മാറ്റിയ സാഹചര്യത്തില്‍ ജംഗ്ഷന്റെ പേരു ഔദ്യോഗികമായി മാറ്റാനുള്ള നടപടികള്‍ സ്വീകരിക്കണമെന്ന് ആലപ്പുഴ ജില്ലാ കളക്ടര്‍ക്കും മുനിസിപ്പല്‍ സെക്രട്ടറിക്കും ഉടനേ കത്ത് അയച്ചിരുന്നുവെങ്കിലും കത്തു ലഭിച്ചെന്ന മറുപടി പോലും ഇതുവരെ ലഭ്യമായിട്ടില്ല.
മുഖ്യമായും യാത്രക്കാര്‍ക്കാണ് ആശുപത്രി മാറ്റം പ്രശ്‌നമാകുന്നത്. പ്രൈവറ്റ് ബസുകളിലും മറ്റും കയറി മെഡിക്കല്‍ കോളജ് ആശുപത്രി എന്നു പറഞ്ഞാല്‍ ഇപ്പോഴത്തെ ജനറല്‍ ആശുപത്രി ജംഗ്ഷനിലേക്കായിരിക്കും ടിക്കറ്റ് നല്കുക. ഇതു തിരിച്ചുമാകാം. ബസുകളിലെ മെഡിക്കല്‍ കോളജ് ആശുപത്രി ബോര്‍ഡ് പലപ്പോഴും പഴയ ആശുപത്രിയെയാണ് സൂചിപ്പിക്കുന്നത്. അതിനാല്‍ ഇവിടെയെത്തി വട്ടംചുറ്റുന്നവരുടെ എണ്ണം കുറയുന്നില്ല.
വണ്ടാനത്തെ ആശുപത്രിയിലേക്കു തിരക്കിച്ചു പോകുന്നവര്‍ പലപ്പോഴും വഴിതെറ്റിപ്പോകുന്നതു കാണാം. ദൂരം കാണിക്കുന്ന ബോര്‍ഡുകള്‍ ആവശ്യത്തിനില്ലാത്തതും ഉള്ള ബോര്‍ഡുകള്‍ തെറ്റിദ്ധരിപ്പിക്കുന്നതും ഇതിനു കൂടുതലായ കാരണമാണ്. ഉദാഹരണത്തിന് കൊട്ടാരപ്പാലം ജംഗ്ഷനില്‍ ഇപ്പോഴുള്ള മെഡിക്കല്‍ കോളജ് ആശുപത്രി എന്ന ചൂണ്ടുപലക തെറ്റിദ്ധരിപ്പിക്കും. ഇപ്പോഴത്തെ ജനറല്‍ ആശുപത്രിയിലേക്കാണ് അതുവഴി പോയാല്‍ ആദ്യം എത്തുക.
കടകള്‍ക്ക് ലൈസന്‍സ് പൂതുക്കണമെങ്കില്‍ ഇപ്പോള്‍ കടയുടെ ബോര്‍ഡുകളില്‍ സ്ഥലപ്പേരു കൂടെ ചേര്‍ക്കേണ്ടതുള്ളതിനാല്‍ പലതരത്തിലുള്ള പേരുകളാണ് അവയില്‍ കാണുന്നത്. മെഡിക്കല്‍ കോളജ് ഹോസ്പിറ്റല്‍ ജംഗ്ഷന്‍, എംസിഎച്ച് ജംഗ്ഷന്‍, ജനറല്‍ ഹോസ്പിറ്റല്‍ ജംഗ്ഷന്‍, ഹോസ്പിറ്റല്‍ ജംഗ്ഷന്‍ എന്നൊക്കെ കടകളുടെ ബോര്‍ഡുകളില്‍ വായിക്കാം.
മെഡിക്കല്‍ കോളജ് ആശുപത്രി കിലോമീറ്ററുകള്‍ ആകലേക്കു മാറ്റിയതിനാല്‍ മറ്റു പ്രദേശങ്ങളില്‍ നിന്നെത്തുന്നവര്‍ക്ക് പട്ടണത്തിലെ മെഡിക്കല്‍ കോളജ് ആശുപത്രി ജംഗ്ഷന്റെ പേര് അങ്ങനെതന്നെ നിലനിര്‍ത്തിയിക്കുന്നതിനാല്‍ തെറ്റിദ്ധാരണയും യാത്രാബുദ്ധിമുട്ടുകളും ഉണ്ടാക്കുമെന്നതിനാല്‍ ജനറല്‍ ഹോസ്പിറ്റല്‍ ജംഗ്ഷന്‍ എന്നു പേരിലേക്കു മാറ്റുന്നതായിരിക്കും ഉചിതം. അല്ലെങ്കില്‍ സ്ഥാപനത്തിന്റെ പേര് ഒഴിവാക്കി ഭാവിയില്‍ കഴിവതും മാറ്റേണ്ടിവരില്ലാത്ത ഒരു പേരിടാവുന്നതുമാണ്.
No comments:
Post a Comment