മാലിന്യം കഴിയുന്നത്ര ഉറവിടങ്ങളില്‍ തന്നെ സംസ്‌ക്കരിക്കാനും പുനരുപയോഗം ചെയ്യാനും ഏര്‍പ്പാടുകളുണ്ടാകേണ്ടിയിരിക്കുന്നു. അതിനു ഫലപ്രദമായ ഏര്‍പ്പാടുകള്‍ ഉണ്ടാകുന്നില്ല. ആശുപത്രി മാലിന്യം, കശാപ്പു മാലിന്യം, പഴം-പച്ചക്കറി മാലിന്യം തുടങ്ങിയവ കൂടാതെ പുറന്തള്ളപ്പെടുന്ന തുണി, കടലാസ്, പ്ലാസ്റ്റിക് തുടങ്ങിയവയില്‍ ഒരു വലിയ പങ്കും ഉത്ഭവസ്ഥാനത്തു തന്നെയോ അവിടങ്ങളില്‍ നിന്നു നേരിട്ടു ശേഖരിച്ചോ സംസ്‌ക്കരിക്കാന്‍ ഏര്‍പ്പാടു വേണം.
ജൈവ, അജൈവ വസ്തുക്കള്‍ വേര്‍തിരിച്ച് ശേഖരിച്ചാല്‍ സംസ്‌ക്കരണ കേന്ദ്രങ്ങളില്‍ അവ അധികം ബുദ്ധിമുട്ടില്ലാതെ വളമായോ ചാരമായോ വൈദ്യുതിയായോ മറ്റു ഉത്പന്നങ്ങളായോ മാറ്റാന്‍ സാധിക്കും.
രാവിലെയും വൈകുന്നേരവും കൃത്യമായി റോഡുവക്കിലുള്ള മാലിന്യങ്ങള്‍ നീക്കം ചെയ്യേണ്ടതുണ്ട്. അല്ലെങ്കില്‍ മണിക്കൂറുകള്‍ കിടന്ന് അഴുകി ദുര്‍ഗന്ധം വമിക്കാന്‍ അതു കാരണമാകും. വിദേശ-തദേശ വിനോദസഞ്ചാര കേന്ദ്രമായ ആലപ്പുഴ പട്ടണത്തിന് അത് ചീത്തപ്പേരുണ്ടാക്കും.
മാലിന്യം വേര്‍തിരിച്ചു ശേഖരിക്കാന്‍ ചെറു വീപ്പകള്‍ റോഡില്‍ കൂടുതല്‍ സ്ഥലങ്ങളില്‍ സ്ഥാപിക്കണം. വീപ്പയോടെ എടുത്തു ലോറിയിലേക്കു മാലിന്യം പകരാന്‍ ചെറുവീപ്പകള്‍ സൗകര്യമാകും. തൊഴിലാളികള്‍ക്ക് കൂടുതല്‍ എളുപ്പവും ആരോഗ്യപ്രദവും ആയിരിക്കുമത്.
റോഡു വക്കില്‍ അലക്ഷ്യമായി മാലിന്യം നിക്ഷേപിക്കുന്നതിനു എതിരേ ബോധവത്കരണവും നിേേക്ഷപിക്കുന്നവരുടെ പേരില്‍ ശിക്ഷാനടപടികളും വേണം. എല്ലാവരും വീപ്പയ്ക്കുളളില്‍ തന്നെ മാലിന്യം നിക്ഷേപിക്കാനും പരിസരത്ത് അവ വിതറാതിരിക്കാനും വേണ്ട സംവിധാനം വ്യാപകമായി ഒരുക്കണം.
ദുര്‍ഗന്ധം വമിച്ചു പ്രദേശമാകെ വ്യാപിച്ചു കിടക്കുന്നതിനാല്‍ ചവറു വീപ്പകള്‍ സ്ഥാപിക്കുന്നതിനു സമീപവാസികള്‍ പൊതുവേ എതിരായിരിക്കും. അതിനാല്‍ സര്‍ക്കാര്‍, പൊതുമേഖല, തദ്ദേശ സ്വയംഭരണ സ്ഥാപനങ്ങളുടെ മുന്നിലുള്ള റോഡില്‍ ചവറു വീപ്പകള്‍ സ്ഥാപിക്കുകയും മാലിന്യനീക്കം ക്രമമാക്കുകയും ചെയ്യുകയാണ് ഉടനേ ചെയ്യേണ്ടത്. ജില്ലാ കളക്ടറേറ്റ്, കോടതി, കെഎസ്ആര്‍ടിസി ബസ് സ്റ്റാന്‍ഡ്, മുനിസിപ്പല്‍ ഓഫീസ്, സ്‌കൂളുകള്‍ തുടങ്ങിയ സ്ഥാപനങ്ങള്‍ ഉദാഹരണം.
ചവഴു വീപ്പകള്‍ ആവശ്യാനുസരണം സ്ഥാപിച്ച് മാലിന്യം റോഡിലേക്കു വലിച്ചെറിയാനുള്ള അവസരം പൊതുജനങ്ങള്‍ക്ക് നല്കാതിരിക്കുകയാണ് മാലിന്യശേഖരണത്തിന്റെ ഭാഗമായി മുനിസിപ്പാലിറ്റി ആദ്യം ചെയ്യേണ്ടത്. പട്ടണ റോഡുകള്‍ അതിനാല്‍ തന്നെ മാലിന്യമുക്തമായി വൃത്തിയായാകുകയും പകര്‍ച്ചവ്യാധികള്‍ക്കുള്ള സാധ്യത കുറയുകയും ചെയ്യും.
No comments:
Post a Comment