ആലപ്പുഴ പട്ടണത്തില്‍ അത്യാധുനിക രീതിയിലുള്ള ഇന്‍ഡോര്‍ സ്റ്റേഡിയ നിര്‍മാണത്തിനുള്ള പ്രാരംഭ പ്രവര്‍ത്തനങ്ങള്‍ ആരംഭിച്ചു.
കായികതാരങ്ങളെ പ്രോത്സാഹിപ്പിക്കുന്നതിനായി ഇന്‍ഡോര്‍ സ്‌റ്റേഡിയം ആലപ്പുഴ പട്ടണത്തിന്റെ ഹൃദയഭാഗത്തു പടുത്തുയര്‍ത്തുന്നതിനായി ആലപ്പുഴ വൈ.എം.സി.എയാണ് മുന്‍കൈ എടുത്ത് ശ്രമം ആരംഭിച്ചിട്ടുള്ളത്. ഇതിനായി ജില്ലാ കളക്ടര്‍ ചെയര്‍മാനായുള്ള ഒരു സൊസൈറ്റിക്കു രൂപം നല്കിക്കഴിഞ്ഞു. കായിക, സാമൂഹ്യ, രാഷ്ട്രീയ രംഗങ്ങളിലെ പ്രമുഖര്‍ ഇതില്‍ അംഗങ്ങളാണ്.
അന്താരാഷ്ടതലത്തില്‍ കായിക താരങ്ങളെ വളര്‍ത്തിയെടുക്കുകയാണ് ഇന്‍ഡോര്‍ സ്‌റ്റേഡിയത്തിന്റെ പരമപ്രധാനമായ ലക്ഷ്യം. കായികപ്രേമികള്‍ ഈ പദ്ധതിയെ ആകാംഷാപൂര്‍വം കാത്തിരിക്കുകയാണ്. വിവിധ കായിക ഇനങ്ങള്‍ക്ക് ഉതകുന്ന ഇന്‍ഡോര്‍ സ്‌റ്റേഡിയം ആലപ്പുഴയില്‍ നിലവിലില്ല. ആലപ്പുഴ വൈ.എം.സി.എയുടെ ആഭിമുഖ്യത്തില്‍ അനേക വര്‍ഷങ്ങളായി ബാസ്‌ക്കറ്റ് ബോള്‍, ടേബിള്‍ ടെന്നിസ് അക്കാഡമികള്‍ പ്രവര്‍ത്തിച്ചു വരുന്നുണ്ട്. കൂടാതെ മികച്ച നിലയിലുള്ള ടൂര്‍ണമെന്റുകളും നടത്തുന്നു.
ഇപ്പോള്‍ വൈ.എം.സി.എ കെട്ടിടങ്ങള്‍ നില്ക്കുന്നതിനു തൊട്ടു വടക്കു വശത്തായിട്ടാണ് ഇന്‍ഡോര്‍ സ്‌റ്റേഡിയം നിര്‍മ്മിക്കാന്‍ പദ്ധതിയിടുന്നത്. സ്റ്റേഡിയ നിര്‍മാണത്തിനായി വൈ.എം.സി.എയുടെ ഉടമസ്ഥതയിലുള്ള നാല്പതു സെന്റ് സ്ഥലം നിര്‍ദ്ദിഷ്ട സൊസൈറ്റിക്കു കൈമാറാന്‍ തീരുമാനമെടുത്തിട്ടുണ്ട്.
സ്ഥലം കൂടാതെ ഏകദേശം ഏഴു കോടിയോളം രൂപ ഈ പദ്ധതിയുടെ നിര്‍മാണപ്രവര്‍ത്തനങ്ങള്‍ക്കായി വേണ്ടിവരും. വിവിധ സ്രോതസുകളില്‍ നിന്നു ആവശ്യമായ പണം സ്വരൂപിക്കാനുള്ള ശ്രമത്തിലാണ് സംഘാടകര്‍.
ആലപ്പുഴ ജില്ലാ കളക്ടര്‍ സൗരഭ് ജയിന്‍ ചെയര്‍മാനും ഡോ.കെ.എസ്.മനോജ് എക്‌സ് എംപി സെക്രട്ടറിയും കേരള ടേബിള്‍ ടെന്നിസ് അസോസിയേഷന്‍ ട്രഷററും ആലപ്പുഴ എച്ച്എഡിഎഫ്‌സി ബാങ്ക് സീനിയര്‍ മാനേജരുമായ മൈക്കിള്‍ മത്തായി ട്രഷററുമായുള്ള സമിതിയാണ് ഇന്‍ഡോര്‍ സ്‌റ്റേഡിയത്തിനായുള്ള ഊര്‍ജിത പ്രവര്‍ത്തനങ്ങള്‍ക്കു നേതൃത്വം നല്കുന്നത്. മറ്റു ഭാരവാഹികള്‍: തോമസ് പോള്‍, സജി ചെറിയാന്‍ (പ്രസിഡന്റ്, ആലപ്പുഴ ഡിസ്ട്രിക്ട് സ്‌പോര്‍ട്‌സ് കൗണ്‍സില്‍) - വൈസ് ചെയര്‍മാന്‍മാര്‍, ഡോ.പി.കുര്യപ്പന്‍ വര്‍ഗീസ് - ജോയിന്റ് സെക്രട്ടറി, കെ.സി.വേണുഗോപാല്‍ എംപി (മിനിസ്റ്റര്‍ ഓഫ് സ്റ്റേറ്റ് ഫോര്‍ പവര്‍), ഡോ.ടി.എം.തോമസ് ഐസക് എംഎല്‍എ, ശ്രീ നാരായണന്‍ (എക്‌സിക്യൂട്ടീവ് എന്‍ജിനിയര്‍, പിഡബഌയുഡി), വര്‍ഗീസ് ജോര്‍ജ് (എക്‌സിക്യൂട്ടീവ് എന്‍ജിനിയര്‍, കെഎസ്ഇബി), എച്ച്.ജലാലുദ്ദീന്‍ (എക്‌സിക്യൂട്ടീവ് എന്‍ജിനിയര്‍, കെഎസ്ഡബ്ലിയുഎ), കെ.ഡി.ഫ്രാന്‍സിസ് (സെക്രട്ടറി, ആലപ്പുഴ ഡിസ്ട്രിക്ട് സ്‌പോര്‍ട്‌സ് കൗണ്‍സില്‍), ഇ.ജേക്കബ് ഫിലിപ്പോസ് (പ്രസിഡന്റ്, എഡിടിടിഎ), ടി.ആര്‍.ആസാദ് (തഹസില്‍ദാര്‍, അമ്പലപ്പുഴ താലൂക്ക്), റോണി മാത്യു, ജേക്കബ് ജോണ്‍, സുനില്‍ മാത്യു ഏബ്രഹാം, ആര്‍.കൃഷ്ണന്‍, എന്‍.സി.ജെ.രാജന്‍, പി.കെ.വെങ്കിട്ടരാമന്‍ (സെക്രട്ടറി, എഡിടിടിഎ), പി.ബാലചന്ദ്രന്‍ (ഡിസ്ട്രിക്ട് ലോ ഓഫീസര്‍) - എക്‌സിക്യൂട്ടീവ് മെംബേഴ്‌സ്.
No comments:
Post a Comment