വീടുകളില്‍ ഒന്നോ രണ്ടോ കൂടുകള്‍ സ്ഥാപിച്ച് പ്രദേശമാകെ ചെറുകിട വളര്‍ത്തല്‍ വ്യാപകമാക്കാം. തേനീച്ച വളര്‍ത്തുന്നവരുടെ കൂട്ടങ്ങള്‍ക്കു (ക്ലസ്റ്റര്‍) രൂപം നല്കിയാല്‍ തേനീച്ചവളര്‍ത്തല്‍ ഉപകരണങ്ങള്‍, തേനീച്ച പരിപാലനം, രോഗങ്ങളേയും കീടങ്ങളേയും പ്രതിരോധിക്കല്‍, തേന്‍ ശേഖരണം, സംസ്‌കരണം, വില്പന തുടങ്ങിയവയും പ്രായേണ എളുപ്പമാകും. മേല്‍നോട്ടത്തിനും സഹകരണമാകാം. തേനീച്ച വളര്‍ത്തല്‍ വിനോദമായി കരുന്നവര്‍ക്കും പ്രോത്സാഹനം നല്‌കേണ്ടതുണ്ട്.
തേനിനും തേനീച്ച ഉത്പന്നങ്ങള്‍ക്കും വേണ്ടി തേനീച്ചകളെ വളര്‍ത്തല്‍ (Apiculture) ലോകവ്യാപകമായി വ്യാവസായിക പ്രാധാന്യമുള്ള ഒരു കൃഷിയാണ്. തേനീച്ചകള്‍ മൂലം പുഷ്പങ്ങളില്‍ പരാഗണം നടക്കുന്നതിനാല്‍ കൃഷിയിടങ്ങളില്‍ വിളവു വര്‍ധിക്കും. ശുദ്ധവും മേല്‍ത്തരവുമായ തേനിന് പൂക്കളിലെ പൂമ്പോടിയും അത്യാവശ്യമാണ്. തെങ്ങുകള്‍ നിറഞ്ഞ പ്രദേശമായതിനാല്‍ വര്‍ഷം മുഴുവന്‍ തേനീച്ചകള്‍ക്കു തേനും പൂമ്പൊടിയും ലഭ്യമായിരിക്കും. ആലപ്പുഴയെ സംബന്ധിച്ചിടത്തോളം തെങ്ങ് ഒരു പ്രധാന പൂമ്പൊടി സ്രോതസായതിനാല്‍ പൂമ്പൊടി ദൗര്‍ലഭ്യം അനുഭവപ്പെടാനിടയില്ലെന്നാണ് വിദഗ്ധര്‍ സൂചിപ്പിക്കുന്നത്. തേനീച്ച വളര്‍ത്തലിന് അത് നല്ലൊരു അടിസ്ഥാന കാര്യമാണ്. എപ്പോഴും പൂത്തു നില്ക്കുന്ന തെങ്ങിന്‍ പൂക്കുലകളില്‍ നിന്ന് തേനീച്ചകള്‍ക്ക് അത് വേഗത്തില്‍ ശേഖരിക്കാനാകും.
തേന്‍ കൂടാതെ തേന്‍മെഴുക്, പൂമ്പൊടി, തേനീച്ചപ്പാല്‍ അഥവാ റോയല്‍ ജെല്ലി (തേനീച്ചയുടെ ഗ്രന്ഥിയില്‍ നിന്ന് ഉത്പാദിപ്പിക്കുന്നു), പ്രൊപ്പോളിസ് (മരക്കറകള്‍ ശേഖരിച്ച് മെഴുകുമായി ചേര്‍ത്ത് തേനീച്ചകള്‍ ഉത്പാദിപ്പിക്കുന്ന പദാര്‍ഥം), തേനീച്ചവിഷം തുടങ്ങി നിരവധി ഉത്പന്നങ്ങള്‍ തേനീച്ചകള്‍ ഉത്പാദിപ്പിക്കുന്നുണ്ട്. ഇവയ്‌ക്കൊക്കെ നിരവധി ഉപയോഗങ്ങളുണ്ട്. ഉദാഹരണത്തിന് പ്രകൃതിജന്യ വസ്തുവായ തേന്‍മെഴുക് ഉപയോഗപ്പെടുത്തി മെഴുകുതിരി, സൗന്ദര്യവര്‍ധക വസ്തുക്കള്‍, പെയിന്റ്, പോളിഷ്, മഷി, വാര്‍ണിഷ്, പശ, ച്യൂയിംഗം, ലിപ്സ്റ്റിക്, ഔഷധങ്ങള്‍ തുടങ്ങി മുന്നൂറില്‍ പരം ഉത്പന്നങ്ങളുണ്ടാക്കുന്നുണ്ട്. ഇങ്ങനെ എല്ലാ തേനീച്ച ഉത്പന്നങ്ങള്‍ക്കും വാണിജ്യപ്രാധാന്യം ഏറെയാണ്.
വന്‍തേന്‍ ഉത്പാദിപ്പിക്കുന്ന വലിയ തേനീച്ചകളെ പെട്ടികളില്‍ (തേനീച്ചക്കൂട്) വളര്‍ത്തുന്നതു പോലെ തന്നെ ചെറുതേന്‍ ഉത്പാദിപ്പിക്കുന്ന ചെറിയ തേനീച്ചകളെ കുടങ്ങളിലും വളര്‍ത്താനാകും.
No comments:
Post a Comment